مش هارجع مصر تاااااااانى

مش هرجع تانى مصر حتى لو هعيش فى قصر انا خلاص بعت القضية هرجع تانى ليه! عشان البنت اللى مش عايزة غير الشقة و العربية ولا الأكل منتهى الصلاحية و لا رغيف العيش اللى قرب يوصل لـ 5 جنيه

مش هرجع تانى مصر حتى لو هعيش فى فيلا العالم وصل للقمر و احنا لسة بنشرب فى قلا و الموظف اللى سمّوه محدود الدخل مرتبه فى الشهر 300 و مصاريف حرمه و ولاده الأربعة بالاقل 1100 و عشان مايبقاش حرامى ياخد الرشوة ويسميها اكرامية

مش هرجع تانى مصر حتى لو بقيت لعيب مشهور فى الأهلى او نجم سينمائى و الناس عايزة تتصور جنبى انا مش عايز اكون فى الثلاثين من عمرى ولسة باخد مصروفى من ابويا و امى

مش هرجع تانى مصر حتى لو بقيت رئيسها كفاية فيها واحد "مباركها" هعمل بــ الرئاسة ايه؟ بقينا فى الألفية التالتة و لسة محتفظين بـ لقبين :"ياباشا" ،يابيه"

مش هرجع تانى مصر حتى لو هعيش فى شقة ع النيل مش عايز واحد يوقفنى فى كمين و يطنطط عليا كانه لواء وهو يدوبك امين

مش عايز ارجع مصر و اسمع نشرة الأخبار او اقرا حظك اليوم فى جريدة الأهرام يعنى حظى هيكون ايه اكتر من البطالة اللى مستنيّا القوة العاملة واللى فكر صح ساب البلد و هاجِر و التانى اشتغل فى العملة

وهقول ايوة هقول… ايه رأيكوا فى تصريحات السيد المسؤول اللى مابيعملش حاجة غير انه يصرح ويقول و مين المظلوم؟ الغلبان اللى بياكل على عربية الفول طب فينه سيادة المسؤول؟ فى فندق 5 نجوم بياكل زى الغول

مش هرجع تانى مصر حتى لو غيّروا التاكسى اللى من الثلاثينات و الشوارع اللى مليانة مطبّات وشافوا حل للمعاكسات و التحرشات كان الشاب عمره ما شاف قبل كدة بنات

مش هرجع تانى مصر حتى لو عملوا ازالة للمناطق العشوائية او بقت لها قيمة الشهادة الجامعية
الشهادة اللى ملهاش لزوم المهندس و الدكتور اللى سافروا برة دلوقتى اترقّوا و بيغسلوا صحون

مش هرجع تانى مصر حتى لو عملولى تمثال فى ميدان كل تمثال و له اوان و كمان كام سنة هينقلونى من مكانى اكيد يعنى مش هكون اغلى من تمثال رمسيس التانى

منقوووووول
بس هو بأمانة كل اللى انا عاوزه اقوله جوايا